حتة سكر كلمات لصمت الكلمات

حتة سكر كلمات لصمت الكلمات
..............................



...كنت انا ماشي مرة ف حالي
قومت قابلت حتة سكر

عيني شافتها ع اللي جرالي
ازاي اوصف عمري ما حقدر

قلبي خطفني وقالي اشيلها
جوة القلب وراح يتسمكر

شفايفي بتهمس اجري ودوقها
عقلي منعني وخوفت اتهور

رجلي بتسبقني ف خطواتي
روح ع السكر روح واتحرر

ايدي واتمدت ناحيتها
قولت رح المس بس مش اكتر

بس اللمسة مالهاش وصف
دبت انا جوة قلب السكر

شوفت حاجات بتفوق الوصف
لسة انا دايب جوة السكر

اوصف ايه حيخوني الوصف
طعم سعادة ما حيتكرر

شوفت ازاي مولود الحب
جوة قوالب شهد مكرر

لسة انا دايب جوة السكر

اول مرة ادوق الحب
واعرف ان الحب مسكر

شوفت بحور الوانها جميلة
جوة عيونها قومت مفكر

انزل اغوص ف بحورها الحلوة
رد الفكر وقالي بتسأل؟؟؟

ايوة صحيح ازاي انا بسأل
منا م الاول كنت مقرر

نازل بحرك من غير شط
فين مرسايا لسة حدور

وان مالقيتش المرسي
رح افضل جوة بحورك
مش حتغير

لسة انا دايب جوة السكر

مش رح ابعد عنك ابدا
دبت انا فيكي وفكري اتحير

خدني الموج جوة ف احضانه
قام وصلني لبابه الاخضر

باب الموج من قلبه بيطرح
بالالوان وفصوص من مرمر

كاتب اسمي علي اسواره
هو دا حاكم قلبي الاخضر

اتبسمت وقولت اخيرا
خدني الموج علي قلب السكر

كنت انا بحلم ادوق واديني
بقيت انا حاكم قلب السكر

من لحظتها وسيبت الدنيا
وبقي عنواني
حتة سكر